Uandaaji wa Mipango ya Matumizi ya Ardhi ya Vijiji umetajwa kuwa ni mojawapo ya mkakati wa muda mrefu wa kulinda maliasili, ikiwa ni pamoja na kutunza vyanzo vya maji na kuhakikisha rasilimali hizo zinatumika kwa njia endelevu kwa manufaa ya kizazi cha sasa na kijacho.

Kupitia mipango hiyo, maeneo muhimu ya ikolojia, yakiwemo misitu ya hifadhi, vyanzo vya maji, mito, mabonde na maeneo oevu, yataweza kutambuliwa rasmi na kutengwa kwa matumizi maalum, hatua inayosaidia kuyakinga dhidi ya uvamizi na uharibifu.

Aidha, mipango hiyo inahakikisha kuwa shughuli za kilimo, ufugaji, makazi na uwekezaji haziingiliani na maeneo nyeti ya mazingira, hivyo kupunguza kwa kiasi kikubwa athari hasi zinazoweza kusababisha kupotea kwa maliasili.

Hatua hiyo inakuja wakati ambapo maeneo mengi ya Vijijini yamekuwa yakikabiliwa na changamoto za uharibifu wa mazingira, ukataji miti ovyo, upanuzi holela wa shughuli za kibinadamu, na kupungua kwa vyanzo vya maji kutokana na mabadiliko ya tabianchi na ongezeko la mahitaji ya ardhi.

Akizungumza wakati wa uandaaji wa mipango ya matumizi ya ardhi katika Vijiji vilivyopo katika Halmashauri ya Mbeya Afisa Maliasili kutoka Halmashauri hiyo amesema mipango ya matumizi ya ardhi ni nyenzo muhimu ya kuhamasisha wananchi kuwa walinzi wa rasilimali zao wenyewe.

Aliongeza kuwa pindi wananchi wanaposhirikishwa kikamilifu katika kupanga matumizi ya ardhi yao, jamii hujenga uelewa mpana kuhusu umuhimu wa kulinda misitu, vyanzo vya maji na maeneo ya hifadhi, na hivyo kuwa tayari kuchukua hatua za hiari za uhifadhi badala ya kusubiri amri au adhabu.

Sambamba na uandaaji wa mipango hiyo, Halmashauri hiyo pia kwa kushirikiana na wadau mbalimbali wa mazingira imekuwa ikitekeleza kampeni za upandaji miti Vijijini kwa kugawa miche ya miti ya asili na ya matunda kwa wananchi, shule, Taasisi za Dini na vikundi vya kijamii kwa lengo la kurejesha uoto wa asili na kuimarisha mifumo ya ikolojia iliyoharibika.

Hatua hii inalenga si tu kurejesha misitu, bali pia kuongeza vyanzo vya kipato kwa wananchi kupitia miti ya matunda na mazao ya misitu.

Wadau wa mazingira wanasema jitihada hizi zina mchango mkubwa katika kuhifadhi vyanzo vya maji, kwani miti ina nafasi muhimu katika kuzuia mmomonyoko wa udongo, kuchuja maji, na kuweka uwiano wa asili wa mzunguko wa maji.

Aidha, kutenga na kulinda maeneo ya vyanzo vya maji kupitia mipango ya matumizi ya ardhi, Vijiji vinajihakikishia upatikanaji wa maji safi na salama kwa matumizi ya nyumbani, kilimo, mifugo pamoja na shughuli nyingine za Kitaifa kama uzalishaji umeme na umwagiliaji wa mashamba makubwa.

Kwa upande mwingine, wataalamu kutoka Tume wanaowezesha uandaaji wa mipango ya matumizi ya ardhi, wanasema kuwa mipango hiyo pia inasaidia kupunguza migogoro ya ardhi inayotokana na kuingiliana kwa matumizi tofauti ya rasilimali. Migogoro kati ya wakulima na wafugaji, au kati ya shughuli za kibinadamu na maeneo ya hifadhi, imekuwa ikichangia uharibifu mkubwa wa mazingira.

Lakini, kupitia uandaaji wa Mipango ya Matumizi ya Ardhi iliyo shirikishi, jamii huafikiana kuhusu matumizi sahihi ya kila eneo, hali inayochochea amani, mshikamano, na uwajibikaji wa pamoja katika uhifadhi wa mazingira.

Kwa ujumla, uandaaji wa mipango ya matumizi ya ardhi ya Vijiji nchini unaonekana kuwa hatua ya kimkakati katika mapambano dhidi ya uharibifu wa mazingira na upotevu wa vyanzo vya maji.

Endapo jitihada hizi zitaendelezwa kwa kushirikisha wananchi, kuimarisha elimu ya mazingira, na kuendeleza kampeni za upandaji miti, wilaya hiyo ina nafasi kubwa ya kuwa mfano wa kuigwa katika matumizi endelevu ya ardhi na uhifadhi wa maliasili nchini.